Ապագայի շախմատիստները


Գագիկն ու Բենիկն իրենց շախմատային հաջողությունների մասին պատմում են առանց ավելորդ հպարտության: Իսկ մինչ այդ հարազատ Մալաթիա-Սեբաստիայի շախմատի մանկապատանեկան մարզադպրոցի բակում որոշում են մրցել միմյանց հետ, բայց այս անգամ ոչ ավանդական ձեռքսեղմամբ: Արագ սկզբնախաղից հետո մտածում ու մեկ-մեկ էլ հարցերին են պատասխանում: Գագիկը, փաստորեն, խաղաքարերից նավակն է սիրում. այն դարձրել է իր շախմատային կեղծանունը, նաև ասոցացնում է իր ազգանվան հետ՝ Նավոյան: Իսկ ահա Բենիկը ավելի շատ սիրում է ձիով խաղաղ: Դե արդեն գուշակեցիք՝ Տիգրան Պետրոսյանի պես:

Հիմա վերադառնանք պատանի շախմատիստների հաջողություններին: Գագիկն անցյալ տարի Հայաստանի առաջնության եզրափակչի մինչև 10 տարեկանների տղաների խմբում գրավել է 1-ին տեղը, Եվրոպայի մինչև 10 տարեկան տղաների առաջնության 5-րդ տեղը, իսկ աշխարհի մինչև 10 տարեկանների կայծակնային շախմատի առաջնությունում զբաղեցրել է 6-րդ հորիզոնականը: Բենիկ Ագասարովը 2020թ.-ի Տիգրան Պետրոսյանի անվան առցանց մրցաշարում մինչև 18 տարեկանների միջև զբաղեցրել է 1-ին տեղն ու նվաճել ոսկե մեդալ, իսկ անցած տարի Երևանի շախմատի պատանիների առաջնության մինչև 10 տարեկանների մրցաշարում և Տիգրան Պետրոսյանի անվան շախմատի տան մինչև 12 տարեկանների առաջնությունում`1-ին հորիզոնականները: Իհարկե, տղաներն այլ հաղթանակներ ևս ունեցել են, բայց դրանք թվելու համար երկար ժամանակ է պետք: Չէ՞ որ արդեն 5 տարի օրը սկսում ու ավարտում են իմաստուն խաղով:


Ոչ-ոքիից հետո արդեն սկսում են հանգիստ սրտով խոսել: Գագիկը շախմատում կարևորում է երկու հանգամանք՝ հակառակորդին հարգելն ու ֆիզիկապես և մտքով շուտ չհոգնելը: Բենիկը հավելում է՝ պետք է զգոնությունը չկորցնել ու ժամանակից շուտ չուրախանալ: Շախմատիստ ընկերներն իրար նաև շախմատում են փոխլրացնում: Գագիկը, օրինակ, իրեն հարձակողական ոճի շախմատիստ է համարում՝ ճիշտ Ռոբերտ Ֆիշերի պես, ով իր համար բոլոր ժամանակների ամենասիրելի շախմատիստն է: Իսկ Բենիկը, ինչպես երևի արդեն նկատեցիք, շատ հաճախ հաղթում է պետրոսյանական պաշտպանողական խաղաոճով: Ասում է՝ իր խաղերն էլ միշտ հանգիստ են, չի շտապում ու պաշտպանվելու վարպետության նրբություններն ավելի լավ գիտի:

Խաղատախտակից այն կողմ՝ առօրյայում էլ շախմատը տղաներին շատ է օգնում. որոշումներ կայացնելուց առաջ երկար են մտածում ու զարգացած տրամաբանություն ունեն: Պարտվելիս չեն տխրում, մի փոքր սրտնեղում են ու փորձում սխալների վրա սովորել: Մինչ դասընկերներն ամառային արձակուրդում են, իրենք շախմատ ամեն օր են պարապում, անգիր գիտեն գրեթե բոլոր շախմատային կայքերն ու տան գրադարանում էլ գրքերի պակաս չունեն: «Սերգեյ Կարյակինը մեզնից 1 տարի էր մեծ, որ դարձավ պատմության ամենաերիտասարդ գրոսմայստերը»,-ասում է Գագիկն ու լռում: Ժամանակը ցույց կտա, բայց ինքը դեռ մեկ նպատակ ունի՝ դառնալ իրոք լավ խաղացող:

Նկարներում ձախից Գագիկն է, աջից՝ Բենիկը, իսկ օրվա տրամադրությունն ապահովելու համար դիտեք մեր վերջին լուսանկարը: