Թումոյի այգին Հայկի համար հոգեհարազատ է: Համանուն ստեղծարար տեխնոլոգիաների կենտրոնում նա համակարգչային խաղերի ծրագրավորում և ռոբոտաշինություն է սովորում: Սակայն բոլոր հետաքրքրությունների հետևում անզիջում կանգնած են 32 սպիտակ ու սև խաղաքարերը:

Հայկը շախմատ է խաղում արդեն 7 տարի: Աջափնյակի մարզադպրոցում ստացած գիտելիքների շնորհիվ այսօր ունի 1-ին կարգ և անհամբերությամբ սպասում է նոր ու հետաքրքիր մրցաշարերի: Ամենասկզբում, ինչպես ամենուրեք ոչ ամեն ինչ էր հեշտությամբ տրվում: Հատկապես սխալվում էր, երբ մրցակիցներին լուրջ չէր վերաբերվում ու ճիշտ չէր գնահատում: Սակայն ժամանակի հետ դա էլ ուղղվեց. այժմ սիրում է խաղալ իր երազանքի շախմատիստների՝ Ֆիշերի, Կասպարովի, երբեմն էլ Տալի պես:

Գագիկը նույնպես Աջափնյակի մարզադպրոցի սան է: Շախմատը նրա ուղեկիցն է դեռևս մանկապարտեզից: Փոքրուց սիրում էր խաղալ հանգիստ ու առանց շտապելու, անգամ հասցրել է քույրիկին սովորեցնել: «Շախմատում հաղթանակն ինձ ուրախացնում է, իսկ երբ պարտվում եմ, ուզում եմ էլի խաղամ ու հաղթեմ»,-ասում է Գագիկը: Ահա այդպես հաղթելով՝ նվաճել է 1-ին կարգ, սակայն դրանով սահմանափակվել չի պատրաստվում: Շախմատը միշտ է մտքում, անգամ երբ հեծանիվ է վարում կամ ընկերների հետ արկածներ որոնում: